د جوزجان ولایت له ښوونیز مرکز څخه سلګونه تنه زده کوونکي فارغ شول

د جوزجان ولایت د اطلاعاتو او کلتور ریاست اړوند د (ښوونیز مرکز) له اتمې او د اکتید موسسې اړوند (د ځوانانو تجارتي مهارتونو او استعدادونو پراختیا مرکز) درېیمې دورې څخه ۹۸۲ تنه زده کوونکو د مسلکي زده کړو ترلاسه کولو وروسته د فراغت سندونه ترلاسه کړل.
له دې ډلې ۲۰۰ تنه د اطلاعاتو او کلتور ریاست اړوند ښوونیز مرکز او ۷۸۲ تنه د اکتید موسسې اړوند (د ځوانانو تجارتي مهارتونو او استعدادونو پراختیا مرکز) له آنلاین  تجارت او کمپیوټر پروګرامونو زده کړو څخه فارغ شول.
د جوزجان ولایت د ځایي حکومتي ادارو مسؤلینو فارغ شویو ځوانانو ته د مبارکۍ تر څنګ د علم حاصلولو په ارزښت او په ټولنه کې د ځوانانو مسؤلیتونو ته په اشارې ټینګار وکړ، چې دوی باید له دغه فرصت څخه د علمي او مسلکي ظرفیتونو په لوړولو کې ګټه پورته کړي، ترڅو په راتلونکي کې خلکو او هېواد ته د خدمت جوګه شي.
د مسؤلینو د معلوماتو پر اساس په تېرو درېیو کلونو کې دوه زره تنه زده کوونکي د اکتید موسسې اړوند (د ځوانانو تجارتي مهارتونو او استعدادونو پراختیا مرکز) له آنلاین تجارت او کمپیوټر پروګرامونو زده کړو څخه فارغ شوي دي.

۱۴۴۷/۳/۲۳ هـ ق