د جوزجان له ښوونيزو مراکزو څخه لسګونه ځوانان فارغ شول
چهارشنبه (۲۹ شوال المکرم ۱۴۴۵) د جوزجان ولايت د اطلاعاتو او فرهنګ رياست مسؤلين وايي: د اکټېډ موسسې په مالي ملاتړ د اطلاعاتو او فرهنګ رياست له دريو ښوونيزو مرکزونو څخه ۵۵۰ تنه ځوانان د انګليسي ژبې، د سي وي ليکنې، فريلانسنګ او کمپيوټر برخو کې له زده کړو کولو وروسته فارغ شول او د فراغت سندونه يې ترلاسه کړل.
د اطلاعاتو او فرهنګ رئيس مولوي سیف الدين معتصم وويل: ځوانان د ټولنې د ملا د تير حيثيت لري، باید د زده کړو په ترلاسه کولو د ټولنې او هيواد په وده او پرمختګ کې ونډه واخلي.
د اکټېډ موسسې ولايتي مسؤل انجینر امان الله امين وويل: دا مهال په دوو ښوونيزو مراکزو کې شاوخوا ۷۰۰ تنه زده کوونکي د ګرافیک ډيزاین، کمپيوټر، انګليسي ژبې او فريلانسنګ برخو کې په زده کړو بوخت دي او د اوسنيو ۵۵۰ تنو فارغينو له جملې څخه ۱۷ تنه ځوانان د فريلانسنګ برخې له زده کړو څخه فارغ شوي دي.
۱۴۰۳/۲/۱۹ هـ ل
۲۰۲۴/۵/۸ میلادي
