د جهادي ارزښتونو د ساتنې په اړه د بېلابېلو ادارو له استازو سره د همغږۍ غونډه وشوه

د اطلاعاتو او کلتور وزارت د رهبرۍ له لوري د جهادي ارزښتونو د ساتنې په اړه د ځینو نورو ادارو له استازو سره د همغږۍ غونډه  وشوه.
غونډه کې د ګرځندوی، مالي او اداري چارو معین مولوي قدرت الله جمال، د خپرونو چارو معین مهاجر فراهي، د هنر او فرهنګ معین مولوي عتیق الله عزیزي، د ځوانانو چارو معین قاري محمد یونس راشد، د جهادي ارزښتونو د ساتنې عمومي رئیس مولوي ذبیح الله نوراني، د چارو ادارې لوی ریاست، دفاع وزارت او کورنیو چارو وزارت استازو ګډون کړی وو.
په پیل کې د ګرځندوی، مالي او اداري چارو معین مولوي قدرت الله جمال د جهادې ارزښتونو د ساتنې د ارزښت او اهمیت په اړه هر اړخیز معلومات شریک کړل او د بېلابېلو ادارو استازو ته یې د جهادي ارزښتونو د ساتنې په برخه کې لازمې سپارښتنې وکړې. 
ورپسې د هنر او فرهنګ معین مولوي عتیق الله عزیزي د جهادي ارزښتونو عمومي ریاست او د هغه د فعالیتونو  په اړه خبرې وکړې او ویې ویل: چې له دغه ریاست سره باید په بېلابېلو برخو کې همکاري وشي، تر څو د تېر شل کلن جهاد آثار په سمه توګه خوندي او وساتل شي.
د جهادي ارزښتونو د ساتنې عمومي رئیس مولوي ذبیح الله نوراني د بېلا بېلو ادارو له استازو څخه وغوښتل چې د یاد ریاست سره د جهادي ارزښتونو د ساتنې او جهادي آثارو په راټولولو کې بشپړه همغږي او همکاري وکړي. 
د یادونې وړ ده چې د ادارو راغلو استازو د جهادي ارزښتونو د ساتنې او جهادي آثارو راټولولو په برخه کې د هر ډول همکارۍ ژمنه وکړه.

۲۰۲۵/۲/۱۱ ھ ق
۱۴۰۳/۱۱/۲۳ ھ ش