د جهادي ارزښتونو او تاریخ د ژوندي ساتلو په موخه د جهادي ارزښتونو د ساتنې عمومي ریاست په فعالیت پیل وکړ

د اطلاعاتو او کلتور وزارت وزیر ښاغلي ملا خیرالله خیرخواه د جهادي ارزښتونو د ساتنې عمومي ریاست د فعالیتونو د پیل په موخه د اړوند رئیسانو سره لومړنۍ ناسته وکړه. 

ښاغلی خیرخواه صاحب وویل: د اطلاعاتو او کلتور وزارت د یاد ریاست په چوکاټ کې درې مهم فعالیتونه تر سره کوي، چې له سمعي او بصري، جهادي موزیم او مستند تاریخ څخه عبارت دي. 

خیرخواه صاحب زیاته کړه؛ د دغه ریاست اصلي موخه دا ده، چې د اشغال پر وړاندې د افغانانو د مېړانې او سرښندنو مستند مواد راټول او په یوه مشخص ارشیف کې وساتل شي.

د وزیر صاحب په وینا؛ د دغه عمومي ریاست د جهادي موزیم برخه به د انګریزانو، پخواني شوروی اتحاد او امریکا پر وړاندې د جهاد په ډګر کې پاتې شوي اثار راټول او یوځای کړي.

هغه ټینګار وکړ، چې د دغه ریاست له لوري مستند تاریخ به د مجاهدینو د قربانیو، محاسن،  مبارزې، سرښندنو، د اشغالګرو د ظلمونو، وحشت او همدارنګه د افغان ولس د مظلومیت ښکارندويي کوي، چې پر واقعیت به ولاړ او له هر ډول لاسوهنې پرته به راتلونکو نسلونو ته وړاندې شي، د دغه کار اهمیت دا دی، چې د افغانستان راتلونکو نسلونو ته د خپلو اسلافو همت او قربانۍ بیانوي او هغوی به په دې توګه خپل ريښتیني اتلان وپېژني،

ښاغلي خيرخواه ډاډ ورکړ، چې د اطلاعاتو او کلتور وزارت به خپل ټول امکانات په کار واچوي، څو دغه ریاست ټاکل شویو موخو ته په ښه ډول ورسېږي. 

۱۴۴۶/۵/۲۲ ھ ق

۱۴۰۳/۹/۴ ھ ل