د تخار د اطلاعاتو او کلتور رئيس د آغاخان بنسټ له استازو سره وکتل

تېره ورځ د تخار ولايت د اطلاعاتو او کلتور رئيس مولوي ذبيح الله انصاري په خپل کاري دفتر کې د آغاخان بنسټ له استازو، محمد آصف خادمي، احمد نويد نوري او محمد ذاکر سروري سره ياد ولايت ته د سيلانيانو د جذب په موخه وکتل.
ښاغلي انصاري وويل: تخار ولايت د ډيری تاريخي او تفريحي ځايونو په درلودو سره د افغانستان يو له غني ولايتونو څخه شمېرل کيږي، د بهرنيو او کورنيو سيلانيانو د ليدنې لپاره د خسده فرخار چمن، په تالقانو کې د زوړ ښار چينه، د ورسج د يغنان حوض، د رستاق ترکان چينه، د کلفګان د سليمان تخت، د دشت قلعه آي خانم او لسګونه نور ځايونه شته، چې تر دې مهاله ورڅخه زرګونه سيلانيانو ليدنه کړې ده.
نوموړي زياته کړه؛ تخار ولايت د سيلانيانو د جذب لپاره د تاريخي ځايونو ترمنځ د سرکونو جوړول، د سيلانيانو لپاره د هوټل جوړول او د ماهيانو فارمونه جوړول ضروري وبلل.
د آغاخان بنسټ استازو د تاريخي ابدو او تفريحي ځايونو د ساتنې، بيارغونې او د سيلانيانو د جذبولو برخه کې د اطلاعاتو او کلتور رياست هڅې د قدر وړ وبللې.
 د يادونې وړ ده چې د ا.ا.ا. حاکميت او هېواد کې د سرتاسري امنيت له امله تخار ولايت ته د امريکا، جاپان، يونان، ايران او پاکستان هېوادونو زرګونه سيلانيان د تاريخي او تفريحي ځايونو د لېدو لپاره راغلي دي،

۱۴۴۵/۷/۱۳ هـ ق
۱۴۰۲/۱۱/۴ هـ ل