د بیهقي ریاست د کتابونو د کره کتنې کمېسیون نوبتي غونډه ترسره شوه
نن پنجشنبه ۱۴۴۴/۷/۱۱ هـ ق د اطلاعاتو او فرهنګ وزارت بیهقي ریاست کې د بیهقي رئیس مولوي عبدالحلیم ځانواک په مشرۍ د کتابونو کره کتنې کمېسیون نوبتي غونډه ترسره شوه، چې پکې د یاد وزارت د ویب سایټ او نشراتو عمومي آمر مولوي رحمت الله نړیوال، د کتابونو د چاپ او خپراوي آمر ښاغلي حمیدالله ویاړ او د کمېسیون نورو غړو ګډون درلود.
غونډه چې د قرآن کریم په څو مبارکو آیتونو پیل شوه، د بیهقي ریاست لخوا چاپېدونکو څو بابه کتابونو کره کتنه وشوه، د کره کتنې په پایله کې هغه کتابونه چې له اسلامي ارزښتونو، افغاني عنعناتو سره سم او د املاء او انشاء له پلوه غني ول، چاپ ته ولیږل شول او کومو کتابونو چې نېمګړتیاوې درلودې، خپلو مسئولو اشخاصو ته د اصلاح په نیت ولیږل شول.
