د بلخ اطلاعاتو او کلتور رياست کې د فريلانسينګ برنامې لپاره ازموينه واخيستل شوه
د اطلاعاتو او کلتور وزارت د ځوانانو چارو معينيت په پام کې لري چې د فريلانسينګ تخصصي ښوونيزې برنامې لپاره د هېواد له هر زون څخه شپږ تنه ځوانان د آزادې سيالۍ له لارې وټاکي.
د ياد پروګرام لپاره د بلخ اطلاعاتو او کلتور رياست د ځوانانو چارو په آمريت کې ۶۰ تنو ځوانانو نومليکنه کړې وه، چې له يادې ډلې څخه ۱۹ تنه شارت لست او له ازموېنې وروسته به شپږ تنه بريالي کسان د هېواد مرکز کابل ته د فريلانسينګ تخصصي ښوونيزې برنامې د درې مياشتنۍ زده کړو لپاره لیږي.
د بلخ اطلاعاتو او کلتور رئيس مولوي ذبیح الله نوراني د ازموينې له بهيره د ليدنې پرمهال وويل: دغه برنامه د ځوانانو چارو معينيت له لوري پيل شوې، چې د زده کړې پرمهال یې ټول لګښت، امکانات او د اوسېدو ځای د اطلاعاتو او کلتور وزارت ورته برابروي.
د زده کړو ترلاسه کولو وروسته به خپلو زونونو کې په دوامداره ډول نورو ځوانانو ته په اړونده برخه کې زده کړې ورکوي.
۱۴۴۵/۳/۵ هـ ق
۱۴۰۲/۶/۲۹ هـ ش
