د بغلان ولایت په مرکزي بغلان ولسوالۍ کې د ځوانانو د فکري ودې لپاره علمي سمینار ترسره شو
د بغلان ولایت د اطلاعاتو او کلتور ریاست د ځوانانو د چارو آمریت لخوا د مرکزي بغلان ولسوالۍ د څو مکتبونو زده کوونکو ته علمي او فکري سمینار جوړ شو.
د بغلان ولایت د اطلاعاتو او کلتور ریاست د ځوانانو د چارو آمریت مسؤل حافظ عبدالرحمن محمدي وویل: په دې سمینار کې د مکتبونو ګڼ شمېر زده کوونکو ګډون کړی وو، د سمینار په ترڅ کې د اسلامي شریعت قوانینو پر بنسټ د ځوانانو د مسؤلیتونو او بیدارۍ په اړه بحثونه وشول.
نوموړي د دې سمینار له ترسره کولو څخه موخه د ځوانانو د فکري ودې او په رضاکارانه فعالیتونو کې د همږغۍ پراختیا یاد کړل او زیاته یې کړه؛ دا ډول سمینارونه به په دوامداره توګه د ځوانانو د علمي او فکري ظرفیتونو د لوړولو لپاره په تعلیمي او تحصیلي ادارو کې ترسره شي.
د رضاکاره ځوانانو مسؤل ډاکټر محمد عوض د سمينار ګډونوالو ته د خبرو پرمهال په مرکزي بغلان ولسوالۍ کې د بې وزله ماشومانو لپاره د وړیا ژمنيو کورسونو د پرانیستو خبر ورکړ.
نوموړي زياته کړه؛ د مرکزي بغلان ولسوالي اوسیدونکي د ځوانانو چارو آمریت له هڅو ستاینه کوي او له مسؤلينو غوښتنه کوي، چې د یادې ولسوالۍ ځوانانو ته زیات پام وکړي.
۱۴۴۶/۵/۲۴ هـ ق
۱۴۰۳/۹/۶ هـ ل
