د بادغیس د اطلاعاتو او کلتور رئیس بالامرغاب ولسوالۍ ته سفر وکړ

تېره ورځ د بادغیس د اطلاعاتو او کلتور رئیس اخندزاده مطیع الله متقي بالامرغاب ولسوالۍ ته سفر وکړ.
ښاغلي متقي د یاد سفر په ترڅ کې د موریچاق له تاریخي کلا چې د سکندر مقدوني په دورې پورې اړه لري او د زاړه پل چې د تیموریانو په دوران پورې اړه لري لیدنه وکړه.
 ښاغلي متقي له يادو سيمو څخه د ليدنې پر مهال له دوو نورو تاريخي ودانيو څخه هم ليدنه وکړه، چې تر اوسه له اطلاعاتو او کلتور ریاست سره ثبت نه دي او د سيمې اوسېدونکي يې يوه د ابو مسلم خراساني مقبره او بله يې د زوړ پل په نوم پېژني او د يادې سيمې تاريخي مخينه هم زیاته ښودل شوې ده. 
له دغه سفر وروسته د اطلاعاتو او کلتور رئيس د بادغيس له والي الحاج مولوي عبدالصمد جاوېد سره د کتنې په ترڅ کې د یادو د تاريخي آبداتو ننګونې شريکې کړې، ښاغلي جاويد په دې اړه وویل: د لرغونو آثارو د ساتنې او بيارغونې په برخه کې به د اطلاعاتو او کلتور له رياست سره پوره همکاري کوي.

۱۴۴۵/۴/۹ هــ ق
۱۴۰۲/۸/۲ هـ ش