د امام اعظم رحمه الله په ننګه د لیکل شوي کتاب د ازموېنې پاېلې اعلان شوي
دوشنبه ( ۱۵ رمضان ۱۴۴۵ ) د ننګرهار ولایت د اطلاعاتو او کلتور ریاست له لوري خراسان پوهنتون کې محصلینو ته د معلوماتو زیاتوالي او د مطالعې د فرهنګ دودولو په موخه د امام اعظم رحمه الله په ننګه لیکل شوی کتاب ورکړل شوی وو، چې تېره ورځ پکې له یو شمېر محصلینو څخه ازموېنه واخستل شوه او نن یې د یوې غونډې په ترڅ کې پاېلې اعلان شوې، چې په مراسمو کې یې د اطلاعاتو او کلتور رئيس قاري احسان الله ساجد، د یاد پوهنتون د بېلابېلو پوهنځیو رئیسانو او ګڼ شمېر محصلینو ګډون کړی وو.
د ځوانانو چارو آمر قاري محمد آصف زهیر وویل؛ کوښښ کوو ځوانانو ته د عصري زده کړو ترڅنګ په دین او مذهب کې هم د معلوماتو ترلاسه کولو داسې پروګرامونه جوړ کړو، چې له یوې خوا په ځوانانو کې د مطالعې فرهنګ دود شي او بل لور د اسلام مبارک دین په برخه کې د دوی معلومات لا زیات شي.
د خراسان پوهنتون د بشري علومو پوهنځي رئیس استاد اورنګ صمیم او څو تنو محصلینو په خپلو خبرو کې ورته پروګرامونه د ځوانانو فکري رغښت لپاره ګټور وبلل او د یادو پروګرامونو د دوام او پراخوالي غوښتنه يې وکړه.
د ازموېنې ګټونکو محصلینو ته په ترتیب سره اول مقام ګټونکي ته ځیرک موبایل، دویم مقام ګټونکي ته ساده موبایل، درېیم مقام ګټونکي ته الفجر ساعت او همدارنګه تر لسم مقام پورې ګټونکو ته ټاکل شوې ډالۍ ورکړل شوې.
