د افغانستان د آبادۍ او پرمختګ لپاره ګړندۍ هڅې روانې دي

د کندز ولايت د اطلاعاتو او کلتور رياست مسؤلينو په دې ولايت کې له قلموالو او مبارزو ځوانانو سره د همږغۍ ناسته وکړه.
د ناستې په پيل کې څو تنو قلموالو مبارزينو خبرې وکړې، دوی وويل: ټول مبارزین ژمن دي، تر څو د اطلاعاتو او کلتور رياست سره په همږغۍ د اسلامي امارت فعالیتونو او لاسته راوړنو ته انعکاس ورکړي.
همدا راز د اطلاعاتو او کلتور رئيس مولوي ګل محمد الیاس په خپلو خبرو کې وويل: الحمدالله - الله پاک داسې نظام را په برخه کړی، چې په تېرو ۴۰ کلونو کې یې ساری نشته، که څه هم ګڼې رسنئ خپل رسالت ادا کوي، خو موږ ته په کار ده، چې د اسلامي امارت د فعالیتونو او لاسته راوړنو د انعکاس په برخه کې د پام وړ نشرات وکړو، ترڅو نړيوالو ته معلومه شي، چې افغانستان هم د آبادۍ او پرمختګ په لور خپلې هڅې ګړندۍ کړي دي.
د یادونې وړ ده چې د کندوز ولايت د اطلاعاتو او کلتور رياست له لوري له قلموالو مبارزينو سره په لومړي ځل دا ډول ناسته ترسره کيږي، چې تر دې وروسته به د همږغۍ ناستې په دوامداره ډول ترسره کيږي.

۱۴۴۶/۶/۲۰ هـ ق
۱۴۰۳/۱۰/۲ هـ ل