د اطلاعاتو او کلتور وزير د جاپان له سفیر سره د همکاريو او فرهنګي میراثونو د ساتنې په اړه خبرې وکړې
یکشنبه ( ۱۸ د جمادی الاولی ۱۴۴۷) د جاپان سفیر ښاغلي ماساموتو کینیچي د اطلاعاتو او کلتور له وزير ښاغلي شيخ صاحب شير احمد حقاني سره د وزارت مقام کې وکتل.
په پيل کې ښاغلي ماساموتو کینیچي د وروستی زلزلې په اړه د تسليت او خواخوږۍ څرګندونې وکړې او ویې ویل: جاپان له زلزله ځپلو سره بشري مرستو ته دوام ورکوي.
نوموړي زياته کړه؛ جاپان د افغانستان د ثبات لپاره هڅې کوي، بشري مسائل له سياسي موضوعاتو سره نه تړي او د اسلامي امارت له لوري د نشه يي توکو پر وړاندې مبارزه او د هېواد په کچه امنيت د ستاينې وړ دي.
ښاغلي ماساموتو کینیچي د افغانستان د رسنيو پر وضعيت هم خبرې وکړې او له ملي موزيم سره یې د هر راز همکارۍ ډاډ ورکړ. نوموړي زیاته کړه، جاپان د اطلاعاتو او کلتور وزارت سره په ګډه د فرهنګي ميراثونو د ساتنې لپاره ژمن دی او دې برخې ته ځانګړی ارزښت ورکوي.
د اطلاعاتو او کلتور وزير ښاغلي شيخ صاحب شير احمد حقاني د جاپان سفير ته د ښه راغلاست ترڅنګ وويل: د جاپان او افغانستان ولسونه تاريخي او ژورې اړيکې لري، له افغان ولس سره د جاپان مرستې صادقانه او له سياسي اهدافو څخه جلا دي، افغان ولس پدې برخه کې مننه کوي او د جاپان سره د اړيکو او همکاريو دوام غواړي.
ښاغلي حقاني صاحب زياته کړه؛ د افغانستان ملي موزيم او د تاريخي آثارو او آبدو د ساتنې په برخه کې د جاپان همکارۍ ډېرې ارزښتناکې دي او په دې برخو کې د لا زياتو همکاريو هيله لري.
د ښاغلي شيخ صاحب حقاني په وينا؛ اسلامي امارت د نشه يي توکو د کښت، سوداګرۍ، قاچاق، استعمال او د معتادينو د درملنې په ټولو برخو کې خپله ژمنتیا ثابته کړې ده، همداراز په هېواد کې رسنۍ د اسلامي او افغاني ارزښتونو په رڼا کې بشپړه ازادي لري او د هغوی د فعاليتونو لپاره مناسب مسير برابر شوی دی.
۱۴۰۴/۸/۱۸ هـ ل
