د اطلاعاتو او کلتور سرپرست د غزني والي سره وکتل

نن شنبه (1444/10/16 هـ ق) د اطلاعاتو او کلتور سرپرست وزیر ملا خیرالله خیرخواه، غزني ولایت ته د خپل سفر په ترڅ کې د یاد ولایت له محترم والي حافظ محمد امین عمري سره وکتل.

په پیل کې د غزني محترم والي د اطلاعاتو او کلتور محترم وزیر صاحب ته د ښه راغلاست ترڅنګ خوښي وښوده، چې یاد ولایت ته یې د تاریخي آبداتو د ساتنې او رغونې او د یاد ولایت د کلتوري او رسنیز فعالیت ارزونې په موخه سفر کړی.

د اطلاعاتو او کلتور وزیر محترم خیرخواه صاحب په خپلو خبرو کې غزنی د تمدن او فرهنګ کور وباله او د غزني تاریخ او تمدن ساتنه یې د یاد وزارت مسؤلیت یاد کړ.

همدا راز ښاغلي وزیر وویل، د اطلاعاتو او کلتور وزارت په پلان کې لري چې د افغان ولس د جهادي ارزښتونو ساتنې په موخه په مرکز او ولایتونو کې موزیمونه جوړ کړي، چې پکې د تېرو دریو جهادونو شهکارۍ او د اتلانو کارنامې په تصویري، ویډیویي او صوتي بڼه وساتل سي.