د اطلاعاتو او کلتور ریاست او د ښاروالۍ مسؤلينو د همږغۍ ګډه ناسته وکړه
د هرات ولایت د اطلاعاتو او کلتور ریاست لخوا د کلتوري او نشراتي همږغۍ د پیاوړتیا په موخه د هرات ښاروالۍ له مسؤولینو سره ګډه ناسته وشوه.
په دې ناسته کې د اطلاعاتو او کلتور رئیس مولوي احمدالله متقي وویل: هرات یو تاریخي، کلتوري او لرغونی ښار دی، چې زیات شمېر تاریخي آبدې لري، نوموړي ټینګار وکړ، چې د دې ارزښتناکو میراثونو د ساتنې لپاره باید ډېرې هڅې وشي.
ښاغلي متقي د اطلاعاتو او کلتور ریاست او هرات ښاروالۍ ترمنځ د ګډو پروګرامونو په ځانګړې توګه د تاریخي آبدو د ساتنې، کلتور او نشراتو برخه کې پر تطبیق ټینګار وکړ.
د هرات ښاروالۍ د تخنیکي او سکتوري خدماتو رئیس انجنیر محمد ایوب سیفالجهاد وویل: ښاروالۍ تل د تاریخي آبدو په ساتنه کې هڅې کړې دي، نوموړي د اطلاعاتو او کلتور ریاست او ښاروالۍ ترمنځ د ګډې کمیټې د جوړولو وړاندیز وکړ، ترڅو په کلتوري او نشراتي فعالیتونو کې لا ډېره همږغي رامنځته شي.
د ناستې په پای کې دواړو خواوو د کلتوري میراثونو او تاریخي آبدو د ساتنې لپاره د ګډې همکارۍ پر اهمیت ټینګار وکړ.
۱۴۴۶/۷/۲۲ ق
۱۴۰۳/۱۱/۴ ل
