د اطلاعاتو او فرهنګ وزیر د افغانستان د سوداګرو او پانګوالو اتحادیې له مسئولینو سره وکتل

نن چهارشنبه ۱۴۴۴/۵/۱۲ هـ ق د اطلاعاتو او فرهنګ وزیر قدرمن ملا خیر الله خیرخواه په خپل کاري دفتر کې د افغانستان د سوداګرو او پانګوالو اتحادیې له مسئولینو سره وکتل.
په کتنه کې خیرخواه صاحب د افغانستان سوداګرو او پانګوالو اتحادیې مسئولینو ته تر ښه راغلاست ویلو وروسته خوښي وښوده، چې د هیواد سوداګر په هیواد کې دننه پانګه اچونه کوي او زیاته یې کړه، چې افغانستان د ټولو ګډ کور دی، په ګډه به یې جوړوو.
وروسته د اتحادیې مسئولینو وویل، خوښ یو چې د ا.ا.ا په راتګ سره هغه خنډونه له منځه تللي دي، چې زموږ د اقتصادي پرمختګ مخه یې نیولي وه او غواړو چې نور هم د لاسي صنایع او هنري نقاشیو لپاره نندارتونونه جوړ سي، ترڅو خلګو ته د ګټې اخیستنې لپاره زمینه برابره سي او په دې اړوند ستاسي بشپړه همکاري غواړو.
خیرخواه صاحب د اتحادیې د مسئولینو ستونزې، غوښتنې او وړاندیزونه واوریدل او اطمینان یې ور کړ چې د خپل اړوند چارو، په ځانګړې توګه د نندارتونونو په جوړولو کې به هر راز همکاري ورسره کوي.