د اطلاعاتو او فرهنګ وزیر: دیني او عصري زده کړې د يوه هېواد د پرمختګ يوازینۍ لاره ده
د اطلاعاتو او فرهنګ وزارت سرپرست ملا خیر الله خیر خواه وايي چې دیني او عصري زده کړې د يوه هېواد د پرمختګ او لاسته راوړنو يوازینۍ غوره لاره ده.
د باختر آژانس سیمه ييز خبریال د خبر له مخې؛ دغه څرګندونې د اطلاعاتو او فرهنګ وزیر ملا خیر الله خیر خواه نن په قندهار پوهنتون کې د دغه پوهنتون له رییس او استادانو سره په کتنه کې وکړې.
ښاغلي خير خواه زياته کړه: خوښ دی چې پوهنتونونه پیل شول او زده کړیالان په عادي شکل خپلو زده کړو ته دوام ورکوي.
هغه دیني او عصري علم د يوه هېواد د پرمختګ او لاسته راوړنو يوازینۍ غوره لاره وبلله او زیاته یې کړه، چې اوسنۍ نړۍ د علم او پرمختګ نړۍ ده، په خبره یې هغه هېوادونه تر نورو مخکي دي، چې ولس یې په علم سمبال وي.
ښاغلي خير خواه د قندهار پوهنتون مشرتابه او ټولو استادانو ته د اسلامي امارت په استازيتوب د همکارۍ ډاډ ورکړ او له دوی یې غوښتنه وکړه چې د علم او پرمختګ په برخه کې خپلې هلې ځلې نورې هم زیاتې کړي.
په همدې حال کې د قندهار پوهنتون رییس او ټولو استادانو وویل چې په پوره توان او زيار سره به د نوي نسل په روزنه کې کوښښ کوي او ډېر تمرکز به یې پر دې وي، چې زده کړیالان په ښه ډول په ديني او عصري علم سمبال کړي.
کابل/ د سلواغې ۱۳ مه/ باختر
