حسينه ساپۍ: ټول بايد د خپل نظام د دوام او ټينګښت لپاره هڅه وکړو

د اطلاعاتو او فرهنګ وزارت سرپرستې حسينې ساپۍ نن د دغه وزارت له مشرتابه پلاوي او کارکوونکو سره په غونډه کې، هغوى ته د نېکمرغه لوى اخترمبارکي وويله.
د باختر آژانس خبريال د خبرله مخې: په دې غونډه کې په داسې حال کې چې د اطلاعاتو او فرهنګ وزارت معينانو، سلاکارانو، رييسانو او کارکوونکو ګډون درلود؛ حسينې ساپۍ د نېکمرغه لوى اختر او د قربانۍ د فلسفې په اړوند معلومات ورکړل او ويې ويل: "خوشحاله يم چې د اختر ورځې په ښه او آرامه فضا کې تېرې شوې."
هغې زياته کړه: د اطلاعاتو او فرهنګ وزارت له پتې څخه موږ د هېواد د نظام د سيستم ملاتړي يوو او د دغه وزارت له کارکوونکو څخه يې وغوښتل چې هر يو بايد په هېواد کې د فرهنګ يوه بېلګه واوسي.
حسينې ساپۍ ټينګار وکړ چې د هېواد هر وګړى د يو افغان په توګه دنده لري چې په هېوادکې د نظام د دوام او ټينګښت او په راتلونکو انتخاباتوکې د ونډې اخيستنې لپاره هڅه وکړي او د هغو کسانو چې د پراختيا، پرمختګ او د خلکو د هوساينې او ملي پيوستون لپاره کار کوي؛ ملاتړ وکړي.