تخار کې رسنيزو سرغړونو ته د رسیدګۍ ناسته ترسره شوه

د تخار ولايت د اطلاعاتو او کلتور رياست له لوري رسنيزو سرغړونو ته د رسيدګۍ ناسته د ياد رياست د مسؤلينو، د رسنيو د استازو او خبريالانو په ګډون ترسره شوه.
د اطلاعاتو او کلتور رئيس مولوي ذبيح الله انصاري د خپلو خبرو په ترڅ کې وويل: رسنۍ د دولت سترګې او غوږونه دي، بايد د اسلامي نظام لاسته راوړنې خپرې کړي او له رسنيزو سرغړونو څخه ډډه وکړي، نوموړي د رسنیو له استازو او خبريالانو وغوښتل، چې د اسلامي امارت نشراتي پالیسي په پام کې ونیسي.
د امر بالمعروف او نهی عن المنکر رياست رئيس مولوي حبيب الله حنفي هم رسنۍ د دولت يوه مهمه برخه وبلله او ټينګار يې وکړ، چې رسنۍ بايد له اسلامي شريعت سره سم عمل وکړي او د امر بالمعروف او نهی عن المنکر او اطلاعاتو او کلتور وزارتونو قوانينو ته احترام وکړي.
همدا راز د خبريالانو د خونديتوب کميټې مسؤل عبدالسميع خاوري او نورو خبريالانو هم په کره او هر اړخيزې اطلاع رسونې او د اسلامي نظام د فعاليتونو په خپرولو ټينګار وکړ.

۱۴۴۶/۴/۱۱ هـ ق
۱۴۰۳/۷/۲۳ هـ ل