تخار کې د کتاب لوستنې یو ورځنی پروګرام ترسره شو
د تخار ولایت د اطلاعاتو او کلتور ریاست د مطالعې کلتور د ودې لپاره د کتاب لوستنې یو ورځنی پروګرام ترسره کړ.
د تخار د اطلاعاتو او کلتور رئیس مولوي ذبيح الله انصاري وویل: یاد پروګرام د عصري او دیني علومو په برخه کې د مطالعې، څېړنې او د کتاب لوستنې کلتور د ترویج لپاره جوړ شوی وو، نوموړي له ځوانانو وغوښتل، چې د مطالعې او څېړنې له لارې د شریعت پابند پاتې شي او د هېواد د کلتور د غنا لپاره خپلې هڅې لا زیاتې کړي.
د کلتور او ګرځندوی آمر استاد نورالدین راسخ د مطالعې سره د ځوانانو د مینې په اړه خوښي څرګنده کړه او ویې ویل: ځوانان کولای شي د کتاب لوستلو په مرسته د هېواد په پرمختګ کې مهمه ونډه واخلي.
ګډونوالو ځوانانو د دې کلتوري پروګرام له جوړېدو خوښي وښوده او له اطلاعاتو او کلتور ریاست څخه یې وغوښتل، چې د ځوانانو په منځ کې د مطالعې کلتور د بنسټیز کولو لپاره لا زیات ګټور او اغېزناک پروګرامونه جوړ کړي.
۱۴۴۶/۷/۱۱ هـ ق
۱۴۰۳/۱۰/۲۳ هـ ل
