بغلان کې له وړیا ښوونیزو مرکزونو څخه ۲۵۰۰ تنه فارغ شول

سه شنبه ( ۱۱ د رمضان المبارک ۱۴۴۶) د بغلان ولايت د اطلاعاتو او کلتور ریاست د ځوانانو چارو آمریت د بېلابېلو ولسواليو له وړیا ښوونیزو مرکزونو څخه ۲۵۰۰ تنه زده کوونکي له بېلابېلو برخو څخه فارغ شول.
د بغلان د اطلاعاتو او کلتور رئیس مولوي اسدالله مصطفی هاشمي وویل: ۲۵۰۰ تنو زده کوونکو چې د وینا فن، پښتو، ریاضي، انګلیسي، سواد زده کړې او کمپیوټر په برخو کې یې زده کړې ترسره کړې وې، نن د یوې غونډې په ترڅ کې فارغ او د فراغت سندونه ورته ورکړل شول.
ښاغلي هاشمي ډاډ څرګند کړ، چې د اطلاعاتو او کلتور ریاست د ځوانانو د فرهنګي او علمي وړتیا لوړولو ته ژمن دی او  هڅه کوي، تر څو له خصوصي ښوونیزو مرکزونو او پوهنتونونو سره د هوکړې تر لاسلیک وروسته د نورو کلونو په څېر ځوانانو ته په تخفیف سره د زده کړو زمینه هم برابره کړي.
د ځوانانو چارو آمر وویل: دغه ۲۵۰۰ زده کوونکي د پلخمري، مرکزي بغلان، بنو، دهصلاح، پلحصار، خوست، فرنګ او ګزرګاه نور ولسوالیو له ښوونیزو مرکزونو څخه فارغ شول، چې په تیرو دریو میاشتو کې د ۶۰ ښوونکو له لوري په وړیا ډول زده کړې ورکړل شوې وې.
د غونډې نورو برخه والو په خپلو ویناوو کې د اطلاعاتو اوکلتور ریاست د وړیا ښوونیز مرکز له هڅو څخه مننه وکړه او د ځوانانو د علمي  او فرهنګي وړتیا د لوړولو برخه کې يې د ترسره کېدونکو پروګرامونو څخه د ملاتړ ډاډ هم ورکړ.

۱۴۰۳/۱۲/۲۱ ل
۲۰۲۵/۳/۱۱ ز