بدخشان کې له وړیا ښوونیز مرکز څخه لسګونه ځوانان فارغ شول 

د بدخشان ولایت د اطلاعاتو او کلتور ریاست د ځوانانو چارو آمریت اړوند وړیا ښوونیز مرکز څخه ۱۷۰ تنه ځوانان د کمپیوټر، انګلیسي ژبې، ویناوالۍ او خطاطۍ له درې میاشتنيو ټولګیو څخه فارغ او د فراغت تصدیق پاڼې یې ترلاسه کړې. 
د اطلاعاتو او کلتور رئیس انجنیر ذبیح‌ الله امیري د هېواد د پرمختګ په برخه کې د ځوان نسل رول مهم یاد کړ او ویې ویل: د هېواد پرمختګ او او بیارغونه د ځوان نسل په سالمې تربیې او فرهنګ دوستۍ پورې تړلی دی.
ښاغلي امیري ټینګار وکړ، چې د هېواد مادي او معنوي ارزښتونه باید په سمه توګه وساتل شي.
دغه راز د ځوانانو چارو آمر وویل: دغه فراغت غونډه د وړیا ښوونیز مرکز د څلورمې دورې فراغت غونډه ده، چې د روان کال په دریو ربعو کې شاوخوا ۹۰۰ تنو ځوانانو ته په بېلابېلو برخو کې روزنه ورکړل شوې ده.
د ځوانانو چارو آمر زیاته کړه؛ تر دې مهال ځوانانو ته ۲۰ بېلابېل د هڅونې سمینارونه جوړ شوي دي او راتلونکي ژمي کې د ۱۰۰۰ تنو نورو ځوانانو روزنې ته چمتوالی نیول شوی دی.

۱۴۴۷/۵/۲۵ ه‍ ق