بادغيس کې د لرغونو آثارو د ويجاړېدو مخنيوی وشو
د اطلاعاتو او کلتور وزارت د لرغون پېژندنې رياست مسلکي پلاوي بادغيس ولايت ته د باغلر نومي سيمې مغارو کې د شته لرغونو آثارو د ويجاړۍ د مخنيوي په موخه سفر وکړ.
پلاوي په یاده ساحه کې تر پلټنو وروسته د هغو مشخصو ځايونو کيندنه شروع کړه، چې د سيلابونو له امله زيانمن شوي وو، چې د کيندنو په ترڅ کې ۹ مات شوي خټين لوښي او د ميچنو دوه تيږې کشف شوې، ياد شوي آثار تر پاک کارۍ، ثبت او بيارغونې وروسته د بادغيس ولايت د اطلاعاتو او کلتور رياست ته وسپارل شول.
ددې ترڅنګ د ياد رياست ۵ قلمه نور خټين او ډبرين آثار چې مخکې له بېلابېلو لرغونو سيمو څخه ترلاسه شوي وو، د لرغون پېژندنې رياست مسلکي پلاوي له لوري پاک کاري او بيا ورغول شول.
د لرغون پېژندنې رئيس انجينر ذبيح الله سادات وايي: د بادغيس ولايت د باغلر سيمه د دې ولايت يو له لرغونو سيمو څخه ده، چې د ترلاسه شويو آثارو څخه يې معلوميږي، چې تر اسلام مخکې دورو پورې اړه لري، نوموړي هيله څرګنده کړه، چې راتلونکي کې وکولای شي، چې دې سيمه کې د لا ډيرو اثارو د ترلاسه کولو او د موزيم د غني کولو لپاره د څېړنو او کيندنو کارونه پيل کړي.
۱۴۴۶/۳/۲۰ هـ ق
۱۴۰۳/۷/۲ هـ ل
