افغان ملت او اسلامي امارت الله تعالی په لوی امتحان کې بریالي کړل

یادې څرګندونې نن سه شنبه ( ۱۴۴۵/۱/۲۸هـ ش) د اطلاعاتو او کلتور سرپرست وزیر ملا خيرالله خیرخواه صاحب له امریکایي اشغال څخه د خپلواکۍ تر لاسه کولو د دوهمې کلیزې په مناسبت جوړې شوې لمانځغونډه کې وکړې، چې پر مهال یې د کابینې یوشمېر وزیرانو، قومي مشرانو او عامو هېوادوالو ګډون درلود.
ښاغلي خیرخواه په خپلو خبرو کې وويل: شل کاله پر افغانستان باندې بد وضعیت تېر شو، داسې کور په ټول هېواد کې پاتې نه شو، چې د اشغالګرو لخوا دې تاواني شوی نه وي، په نړۍ کې کم هېوادونه پاتې و، چې دلته یې د اشغالګرو ملاتړ ونه کړ، خو زموږ سپېڅلي قیام او بیا تاريخي فتحې په نړیواله کچه د وېښو مسلمانانو زړونه یخ کړل.
د ښاغلي خیرخواه په خبره، افغان ملت هېڅ یرغل نه مني، نور دې څوک د اسلامي امارت د ړنګېدو خوبونه نه ويني، الله تعالی افغانان په خپل امتحان کې بریالي کړل. خپل مؤمن ملت ته ډاډ ورکوو، چې ټولو ستونزو ته مو رسېدنه کیږي، نور د پرمختګ پر لور روان یو، باور لرو چې په لنډ وخت کې به مو هېواد د لویو پر مختګونو شاهد وي.