اطلاعاتو ته د لاسرسي ریاست د مرکزي زون له وياندويانو او رسنيو سره د همږغۍ غونډه ترسره شوه

پنجشنبه ( ۲۴ د جمادی الثاني ۱۴۴۶) د اطلاعاتو او کلتور وزارت د خپرونو چارو معينيت اړوند اطلاعاتو ته د لاسرسي رياست په مرکز کابل کې د مرکزي زون له ولايتي وياندويانو او نشراتي مسؤلينو سره د همږغۍ غونډې په دوام نن د ياد زون د ولايتي ادارو له وياندويانو او رسنيو سره د همغږۍ غونډه ترسره شوه.

غونډې ته د وينا پرمهال اطلاعاتو ته د لاسرسي رياست رئيس مولوي رحمت الله نړيوال وویل:په هېواد کې اطلاعاتو ته د لاسرسي پروسه چټکه شوې ده او لا هم د پراختيا په حال کې ده، د ټولو دولتي ادارو وياندويان او مطبوعاتي مسؤلين مکلف دي، چې له رسنيو سره پر وخت معلومات شريک کړي، نوموړي زياته کړه؛ رسنۍ باید د خپرونو پرمهال اسلامي ارزښتونه، افغاني ټولنيز کلتورونه او ملي ګټې په نظر کې ونيسي.

همدارنګه د مطبوعاتو او د رسنيو پر نشراتو د څار رياست رئيس مولوي صفی الله رائد وویل: هڅه کوو، چې د رسنيو ټولو ستونزو ته رسيدګي وکړو، د رسنيو او خبريالانو د مالي ملاتړ په موخه د خبريالانو او رسنيو د ملاتړ صندوق طرحه نهايي شوې ده، چې د تائيد په موخه د رهبرۍ مقام ته استول شوې ده، د اطلاعاتو او کلتور وزارت په ټول توان سره هڅې کړې دي، چې د رسنيو او وياندويانو ترمنځ همږغي رامنځته کړي.

ښاغلي رائد زياته کړه، په مرکز او ولايتونو کې هېڅ ارګان نشي کولای چې د اطلاعاتو او کلتور رياستونو له همږغۍ پرته خبريالان او رسنۍ احضار کړي، د رسنيو د تخطيو اړوند به يوازې د رسنيزو تخطيو کميسيون پرېکړه کوي، بل هېڅ ارګان د مداخلې حق نلري، د يوټيوب چینلونو لپاره طرزالعمل اماده شوی دی، چې ډېر ژر به عملي شي او يوټيوب چینلونو ته به د جوازونو ورکړه پيل شي، په ولايتونو کې د مطبوعاتو او رسنيو پر نشراتو د څار مسؤليت د اطلاعاتو آمريتونو په غاړه دی.

د غونډې په وروستيو شېبو کې د مرکزي زون د رسنيو مسؤلينو او وياندويانو خپلې غوښتنې، پوښتنې او وړانديزونه شريک کړل، چې د مسؤلينو له لوري ورته قناعت ورکوونکي ځوابونه ورکړل شول.

غونډه د دعايې په لوستلو سره پای ته ورسېده.

۱۴۰۳/۱۰/۶ هـ ل

۲۰۲۴/۱۲/۲۶ میلادي