اطلاعاتو او کلتور ریاست کې د ځوانانو د یووالې او انسجام په موخه غونډه وشوه
پکتیا اطلاعاتو او کلتور ریاست کې د ځوانانو چارو آمریت په هڅو د دغه ولایت د فکري مبارزینو او مخلصو ځوانانو ترمنځ د یووالې او انسجام په موخه پراخه غونډه وشوه.
د پکتیا ولايت اطلاعاتو او کلتور رئیس مولوي ثواب جان اسلام یار دغې غونډې ته په وینا کې وويل: ځوانانو ته اوس مهال د فکري او فرهنګي مبارزې په برخه کې لوی مسؤلیت ور تر غاړې دی، ځوانان باید خپلو ملي، اسلامي ارزښتونو او نظام ته ژمن واوسي او د نظام ټینګښت لپاره نه ستړې کېدونکې هلې ځلې وکړي، نوموړي د ځوانانو څخه غوښتنه وکړه، چې خپل منځ کې سره متحد شي انسجام او یووالی غوره کړي.
عبدالخالق خالقیار احمدزي د غونډې ګډونوالو ته وويل: په پکتیا کې د تېر په پرتله د رسنیو او ځوانانو فعالیتونه او یووالی ډېر ښه شوی، د ځوانانو څخه باید په ټولو برخو کې د نظام په ګټه کار واخیستل شي او اطلاعاتو او کلتور وزارت د ځوانانو او رسنیو لپاره ډېر ښه پروګرامونه لري.
ښاغلي احمدزي ځوانانو ته یو لړ لازمې سپارښتنې وکړې چې په فکري، تعلیمي او اسلامي برخو کې خپل فعالیتونه پیاوړي کړي او په دغو برخو کې لیکنې هم وکړي.
۱۴۴۶/۰۸/۱۵ ھ ق
۱۴۰۳/۱۱/۲۶ ھ ش
