اطلاعاتو او کلتور رياست له ښوونيز مرکز سره د تخفیف هوکړه لاسلیک کړه
د ننګرهار ولايت د اطلاعاتو او کلتور ریاست د ځوانانو چارو آمر قاري محمد آصف زهیر او صبر د ساينسي او ټولنيزو علومو اکاډمۍ مسؤل ترمنځ په فیس کې د تخفیف ورکولو هوکړه لیک لاسلیک شو.
د ځوانانو چارو آمر وايي: کوم ځوانان، چې یادې اکاډمۍ ته ورمعرفي کوو، دوی به ورته په انګليسي ژبې، کانکور آمادګۍ، کمپیوټر زده کړې، ديني زده کړو، ليک او لوست او نورو برخو کې په میاشتني فیس کې ۵۰ سلنه تخفیف ورکوي.
نوموړي زياته کړه؛ سږ کال مو په ننګرهار کې ټولو پوهنتونونو او تعلیمي مراکزو سره د ځوانانو د زده کړو ترلاسه کولو لپاره بېلابېل هوکړه لیکونه لاسلیک کړي، چې تر دې دمه مو څه له پاسه ۱۰۰۰ تنه ځوانان ورمعرفي کړي، چې اوس عملاً پر زده کړو بوخت دي او دا لړۍ دوام لري.
۱۴۴۶/۳/۲۹ هـ ق
۱۴۰۳/۷/۱۱ هـ ل
