د بلخ ولسوالۍ له يو شمېر تاريخي آبدو څخه ليدنه وشوه
د بلخ ولايت د اطلاعاتو او کلتور رئيس مولوي محمدالله ضرار د يو پلاوي په ملتيا د بلخ ولسوالۍ له يو شمېر مهمو تاريخي آبدو لکه د بلخ ولسوالۍ اړوند د مير روزه دار زیارت، چې په څلورمه هجري پېړۍ پورې اړه لري، د نه ګنبد مسجد، چې په افغانستان کې د مسلمانانو لومړنی مسجد دی او مزار بلند له تاريخي آبدې چې په درېیمې هجرې پېړۍ پورې اړه لري، ليدنه وکړه.
ښاغلي ضرار وويل: الحمدالله بلخ ولايت د ډېرو تاريخي آبداتو او لرغونو سيمو په درلودلو سره په هېواد او نړۍ کې ځانګړی ځای لري، له همدې امله د نړۍ له ګڼو هېوادونو څخه ورته ګرځندويان راځي، تاريخي آبدات د افغانستان د اسلامي تمدن بډای فرهنګ او لرغوني تاريخ ښکارندويي کوي.
ښاغلي ضرار زياته کړه، د اطلاعاتو او کلتور رياست له فرهنګي سازمانونو، نړيوالو بنسټونو او اړوندو امارتي ادارو سره همغږي رامنځته کړې، ترڅو هغه آبدات چې بيارغونې ته اړتيا ولري ورغول شي.
د يادونې وړ ده، چې د بلخ ولايت بلخ ولسوالۍ د زرګونو کلونو تاريخ لري او په دغه سيمه کې مهم تاريخي آبدات او لرغونې سیمې شتون لري، چې د کورنيو او بهرنيو سيلانيانو پام يې ځان ته را اړولی دی.
