د کابل ښار اتمه ناحیه کې د مطالعې دودولو یو ورځنی سيمينار ترسره شو
تیره ورځ د کابل ښار اتمې ناحيې سيد نور محمد شاه مېنه کې د اطلاعاتو او کلتور وزارت د عامه کتابتونو رياست له لوري د مطالعې دودولو په موخه يو ورځنی سيمينار ترسره شو.
سيمينار په سيد نور محمد شاه مېنه کې د افغانستان فن او بيان مرکز (اماج ښوونيز علمي مرکز) کې د عامه کتابتونو په استازولۍ د بخت مرجان بختيار، د عامه اړيکو مسؤل عتيق الله او معين خان لخوا پر مخ وړل کېده، چې پکې د ياد علمي مرکز د غړو ترڅنګ د سيمې اوسيدونکو، ليکوالانو، زده کړيالانو او فرهنګپالو ګډون درلود.
د سيمينار ګډونوالو د اطلاعاتو او کلتور وزارت او عامه کتابتونو رياست څخه د ياد سيمينار د جوړولو له امله مننه وکړه.
د عامه کتابتونو د عامه اړيکو مسؤل عتيق الله له لوري د مطالعې د ترويج تر عنوان لاندې ګډونوالو ته سيمينار وړاندې کړل شو، ورپسې بخت مرجان بختيار د عامه کتابتونو د ارزښت په اړه لنډ معلومات شريک کړل او له ځوانانو يې وغوښتل چې د خپلو معلوماتو او علمي سويې د لوړولو په موخه ډير کتابونه مطالعه کړي.
په پای کې د غونډې ګډونوالو د عامه کتابتونو له رياست څخه د دغه بهير د غزولو غوښتنه وکړه.
۱۴۴۴/۸/۲۵ هـ ق
۱۴۰۱/۱۲/۲۷ هـ ش
