په مالستان او اجیرستان ولسوالیو کې د (رسنیزې پوهې او فکري جګړې) په نومونو علمي سیمینارونه وړاندې شول
د غزني ولایت د اطلاعاتو او فرهنګ ریاست له لوري، د پوهنې آمریتونو په همغږۍ په مالستان او اجیرستان ولسوالۍ کې د ښوونځیو استادانو، ځوانانو، فرهنګیانو، رسنیزو کارکوونکو او زدهکوونکو ته د (رسنیزې پوهې او فکري جګړې) په نومونو علمي سیمینارونه وړاندې شول.
د غزني د اطلاعاتو او فرهنګ رییس ملا حمیدالله نثار د عامه پوهاوي په برخه کې د رسنیو رول مهم وباله او له ځوانانو څخه یې وغوښتل چې له هېواد څخه بهر فعالیت کوونکو رسنیو ته چې د اسلامي شریعت او ملي ګټو خلاف خپرونې لري پام ونه کړي.
نوموړي د ناوړه دودونو فرمان د تشریح تر څنګ د رسنیزې پوهې او د درواغو خبرونو او اوازو د پېژندلو د لارو چارو په اړه معلومات وړاندې کړل او ویې ویل: ځینې بهرنۍ رسنۍ د ژورنالیزم اصول او اخلاق نه مراعتوي. ښاغلي نثار له ځوانانو څخه وغوښتل چې د تبلیغاتو او فکري جګړې پر وړاندې هوښیار واوسي او د بهرنیو هېوادونو له خوا د ملاتړ کېدونکو رسنیو تر اغېز لاندې رانشي.
همدارنګه، د اطلاعاتو او فرهنګ ریاست اړوند ښوونیز مرکز استاد انورالحق عمر د ټولنې د فکري ثبات، د فکري جګړې د ماهیت او پایلو په اړه وینا وکړه او د دغې جګړې پر وړاندې یې د مبارزې لپاره د خلکو او حکومت پر یووالي ټینګار وکړ.
په پای کې، د مالستان او اجیرستان ولسوالیو مسئولینو او ځوانانو د ورته پروګرامونو جوړول د ځوانانو د فکري پوهاوي لوړولو او د اسلامي امارت او خلکو ترمنځ د اړیکو د پیاوړتیا لپاره اغېزمن وبلل او د دغو پروګرامونو د دوامداره جوړیدو غوښتونکي شول.
۱۴۴۸/۲/۲۴ هـ ق
