(مطالعه په هرځای کې د هرچا لپاره) په نامه علمي او کلتوري سفر تر سره شو
لغمان کې د اطلاعاتو او کلتور ریاست یو شمېر مسؤلینو، لیکوالانو، شاعرانو او د یقین خصوصي ښوونځي مسؤلینو او زده کوونکو (مطالعه په هرځای کې د هرچا لپاره) ترنامه لاندې د مطالعې کلتور د دودولو په موخه الینګار ولسوالۍ ته علمي او کلتوري سفر ترسره کړ، چې په دې سفر کې یې د الینګار ولسوالۍ د عامه کتابتون لیدو ترڅنګ یو شمېر تاریخي ځایونه هم ولیدل.
د اطلاعاتو او کلتور رئیس مولوي عبدالنور رسولي وویل: د اطلاعاتو او کلتور ریاست مسؤلین هرکال د مطالعې د دودولو په موخه بېلابېلو سیمو ته علمي او کلتوري سفرونه کوي، ترڅو ولسونو ته د مطالعې کلتور دودولو پیغام ورسوي.
نوموړي زیاته کړه؛ الینګار ولسوالۍ ته د سفر په لړ کې یې د مطالعې کلتور پیاړتیا په موخه د ولسوالۍ عامه کتابتون ته یو شمېر کتابونه ډالۍ کړل او د لارې په اوږدو کې یې پر زده کوونکو او د بېلابېلو سیمو پر اوسیدوونکو یو شمېر کتابونه هم وویشل.
دلیکوالانو، شاعرانو او د یقین خصوصي ښوونځي مدیر د یاد سفر امکاناتو برابرولو له امله د اطلاعاتو او کلتور ریاست څخه مننه وکړه او داسې سفرونه یې د مطالعې کلتور د دودولو په برخه کې ګټور وبلل، د دوی په وينا؛ مطالعه مو هېواد له پرمختللو هېوادونو سره سیال کوي او بېلابېلو برخو کې د پرمختګونو سبب کېږي.
ورته مهال زده کوونکو هم دا ډول علمي او کلتوري سفرونه د زده کوونکو د فکري رغونې، مطالعې سره د لا ښه اشنا کیدو او تفریح لپاره ګټور وبلل.
۱۴۴۷/۱۱/۱۹ هـ ق
