د پنځمې ناحیې عامه کتابتون کې د ماشومانو لپاره روزنیز او کلتوري پروګرام ترسره شو
د عامه کتابتونونو ریاست له لوري د کابل ښار د پنځمې ناحیې عامه کتابتون کې د ماشومانو لپاره روزنیز او فرهنګي پروګرام ترسره شو، چې پکې د عامه کتابتونونو رئیس دوکتور رفیعالله صمیم، د پنځمې ناحیې یو شمېر اوسیدونکو، د ماشومانو والدینو او ماشومانو ګډون کړی وو.
دوکتور رفیعالله صمیم ماشومانو ته د مطالعې په ارزښت او ګټو هر اړخیزې خبرې وکړې او ماشومان یې وهڅول چې له کتابونو سره مینه پیدا او مطالعه خپل ورځنۍ عادت وګرځوي.
ښاغلي صمیم د ماشومانو والدینو ته ډاډ ورکړ، چې په راتلونکي کې به د دوی د ماشومانو د ذهني ودې، فکري پیاوړتیا او مطالعې کلتور د پراختیا لپاره لا ډېر روزنیز او کلتوري پروګرامونه جوړ کړي او له دغه پروګرام څخه یې موخه د نوې نسل هڅونه، د مطالعې دود پیاوړتیا او د ماشومانو د مهارتونو روزنه یاده کړه.
دغه راز د پروګرام ګډونوالو د عامه کتابتونونو له ریاست څخه د ماشومانو د علمي او ذهني وړتیاوو د غني کولو په برخه کې مننه وکړه او دغه پروګرامونه یې د ماشومانو د زده کړو او هڅونې لپاره ارزښتناک وبلل.
د پروګرام په لړ کې ماشومانو هغه څه نندارې ته وړاندې کړل، چې د زدهکړو په ترڅ کې یې زده کړي وو، ماشومانو د قرآنکریم تلاوت، ترانې، شعرونه او لنډې مقالې ولوستلې، چې د ګډونوالو له لوري په خوښۍ بدرګه شول.
۱۴۴۷/۶/۲۰ هـ ق
