په ننګرهار کې د عامه کتابتون د لوستونکو شمېر ۳۰ سلنه زيات شوی
د اطلاعاتو او کلتور ریاست اړوند د عامه کتابتون مسؤل ضیاءالدین همت مل وايي: د عامه کتابتون د لوستونکو شمېر د تېر کال په پرتله سږ کال ۳۰ سلنه زيات شوی دی، چې د جمعې مبارکې ورځې په ګډون هره ورځ شاوخوا ۲۰۰ کسان د مطالعې لپاره دغه کتابتون ته ورځي.
نوموړي زیاته کړه، اوس مهال په کتابتون کې شاوخوا ۱۳ زره بېلابېل کتابونه موجود دي، چې لوستونکي کولی شي، د خپلې خوښې کتابونه پکې مطالعه کړي. هغه وویل: هڅه کوو، چې خپلو مراجعينو ته د نوي عصر مطابق نور امکانات هم برابر کړو.
همت مل له ځوانانو غوښتنه وکړه، چې د پوهې ترلاسه کولو لپاره د مطالعې کلتور خپل کړي او د هېواد د پرمختګ لپاره هڅې وکړي.
د اباسین په نوم د ننګرهار پوهنتون د زراعت پوهنځي یوه محصل وویل: درې کاله کېږي هره ورځ دغه کتابتون ته د مطالعې لپاره راځي او د خپلې خوښې کتابونه مطالعه کوي، نوموړي له اطلاعاتو او کلتور ریاست څخه وغوښتل، چې د کتابونو ترڅنګ د انلاین کتابتون او انټرنېټ امکانات هم برابر کړي، ترڅو د مطالعې په برخه کې له پرمختلليو اسانتیاوو څخه برخمن شي.
۱۴۴۶/۶/۲۷ ھـ ق
۱۴۰۳/۱۰/۹ ھـ ل
