میوند ولسوالۍ کې ۵۰ تنه له ښوونيز مرکز څخه فارغ شول
د کندهار ولايت په میوند ولسوالۍ کي د اطلاعاتو او کلتور رياست اړوند ښوونيز مرکز څخه ۵۰ تنه د کمپيوټر له زده کړو فارغ شول.
د فراغت په مراسمو کي يې د ځوانانو چارو آمر حافظ حمدالله سعيد د میوند ولسوالۍ د علماو شورا مشر شيخ محمد يوسف ډيرو نورو مسؤلينو او عامو خلکو ګډون کړی وو.
د ځوانانو چارو آمر حافظ حمدالله سعيد وويل: چي دغو ۵۰ تنو ځوانانو ته د مسلکي استادانو له خوا په کمپيوټر برخه کي څلور نيمې مياشتې زده کړې ورکړل شوې، چې نن ورته د فراغت سندونه ورکړل شول.
ښاغلي سعيد زياته کړه؛ ځوانان د ټولنې باارزښته قشر دی، د ځوانانو چارو آمريت په پام کې لري، چې د کندهار د مرکز او ولسواليو ځوانانو ته ښوونيز سمينارونه او ورکشاپونه ترسره کړي، تر څو ځوانان د مايوسۍ له حالته راووځي، او د زده کړو په ترلاسه کولو سره يو روښانه آينده ولري.
د ميوند ولسوالۍ د علماوو شورا مشر شيخ محمد يوسف فارغ شوو ځوانانو ته د علم د ارزښت په اړه وينا وکړه او ويې ويل: د زده کړو ترلاسه کولو لپاره هڅې کول د ځوانانو لپاره د روښانه آیندې تضمين دی، نوموړي د ځوانانو د زده کړو لپاره د اطلاعاتو او کلتور رياست له هڅو مننه وکړه.
د يادونې وړ ده، چې د کندهار د اطلاعاتو او کلتور رياست د ځوانانو چارو آمريت اړوند ښوونيزو مرکزونو کې چې د مرکز په ګډون په ځينو ولسواليو کې موجود دي، سلګونه تنه ځوانان د عربي، ترکي او انګليسي ژبو د زده کړو ترڅنګ د کمپيوټر زده کړه په وړيا ډول کوي.
۱۴۴۶/۳/۴ هـ ق
۱۴۰۳/۶/۱۷ هـ ل
