فراشغان کې د امارت پېژندنې کتاب علمي سيالۍ ازموينه واخيستل شوه
د لغمان ولايت د اطلاعاتو او کلتور ریاست له لوري د دولت شاه ولسوالۍ اړوند د فراشغان سیمې د بیلابیلو ښوونځیو او مدرسو له شاوخوا (۳۰۰) تنو زده کوونکو څخه د امارت پېژندنې کتاب علمي سیالۍ ازموینه واخیستل شوه.
د اطلاعاتو او کلتور ریاست د ځوانانو چارو امر ذبیح الله ناصح وویل: ددې سیالۍ موخه د ځوانانو فکري اصلاح، روزنه، علمي سویه لوړول او ترڅنګ یې ځوانان مطالعې ته تشویقول دي.
د نوموړي په وينا؛ ددې سیالیو د پایلو تر اعلان وروسته به غوره او مخکښ ګډونوالو په بيلابيلو ډالیو ونازول شي.
په ازموینه کې ګډون کوونکو زده کوونکو دا ډول سیالۍ د فکري روزنې او علمي سويې په لوړولو کې مهمې وبللې، هغوی وویل: په دغه کتاب کې یې د امارت اړوند ډیر معلومات ترلاسه کړل.
د يادونې وړ ده، چې له دې مخکې په قرغیو، دولت شاه او ځینو نورو سیمو کې دا ډول سیالۍ ترسره شوي دي او مخکښ ګډونوال يې په بيلابيلو ډالیو نازول شوي.
۱۴۴۶/۲/۱/ ھ ق
۱۴۰۳/۵/۱۵ ھ ل
