د جوزجان د اطلاعاتو او کلتور رئيس د يوناما د دفتر له مسؤل سره وکتل
د جوزجان ولايت د اطلاعاتو او کلتور رئيس مولوي سیف الدين معتصم په خپل کاري دفتر کې د شمال زون د يوناما د دفتر له مسؤل الن فيلو سره وکتل، چې پرمهال يې د يوناما د دفتر د سیاسي برخې مسؤل انجينر محمد يعقوب ايوبي هم حضور درلود.
په شمال زون کې د يوناما د دفتر مشر الن فيلو د اطلاعاتو او کلتور له رئيس سره د ليدنې پر مهال خوښي څرګنده کړه او ويې ويل: په جوزجان ولايت کې کلتوري او اجتماعي فعاليتونه ښه روان دي.
ورپسې ښاغلي معتصم په دغه ولايت کې د کلتوري فعاليتونو، د ځوانانو لپاره د ظرفيتونو د لوړولو د پروګرامونو او د رسنيو د فعاليتونو يادونه وکړه او ويې ويل: د اطلاعاتو او کلتور وزارت د تګلارو له مخې په کلتوري او رسنيزو برخو کې لا هڅې کوو.
همدارنګه ښاغلي معتصم په شمال زون کې د يوناما د دفتر له مسؤل وغوښتل چې په دغه ولایت کې د لرغونو آثارو او تاریخي ابدو په بيا رغونه همکاري وکړي.
ورپسې په شمال زون کې د یوناما د دفتر مشر الن فیلو وویل: موږ به ستاسو ټول وړاندیزونه مرکزي دفتر ته ورسوو او په یادو برخو کې يې د بشپړې همکارۍ ډاډ ورکړ.
۱۴۴۵/۵/۱۳ هـ ق
۱۴۰۲/۹/۶ هـ ش
