په پکتیکا کې شریعت غږ راډیو فعالیت پیل کړل
په پکتیکا کې د شریعت غږ په نوم راډیو د دې ولایت د اطلاعاتو او کلتور ریاست تر چتر لاندې نن رسماً خپل فعالیت پیل کړ، چې د پیل په مراسمو کې یې د پکتیکا والي، د اطلاعاتو او کلتور رئیس محمد امین حذیفه، د بدني روزنې او ورزشي چارو آمر، د شریعت غږ راډیو او ملي تلویزیون آمر او د بېلا بېلو رسنیو خبریالانو ګډون کړی و.
په پیل کې ښاغلي حذیفه د راډیو په ارزښت هر اړخېزې خبرې وکړې او زیاته یې کړه، چې د دې راډیو فعالول یې لوی ارمان و، په دې سره به د خپل شل کلن ستړي مزل یادونه تازه کوي.
ورپسې د شریعت غږ راډیو او ملي تلویزیون آمر رحیم خان خوشال په خپلو خبرو کې ډاډ څرګند کړ چې د راډیو چارې به په ډېر سم ډول د مسلکي خبریالانو په واسطه مخته وړي او دغه راډیو به د ولس ريښتینی غږ اوچتوي او د حقایقو هنداره به وي.
وروسته د پکتیکا والي مولوي فیض الله جمال حقاني د اطلاعاتو او کلتور ریاست کړنې او نوښتونه وستایل او زیاته یې کړه، رسنۍ د ولس او دولت تر منځ د پول حيثيت لري او باوري یم چې دغه رسنۍ به په دې برخه کې لا ډېر څه ترسره کړي.
۱۴۴۵/۳/۱۲ هـ ق
۱۴۰۲/۷/۵ هـ ش
