د نيمروز اطلاعاتو او فرهنګ رئيس په لويديځ زون کې د خبريالانو د خونديتوب کمېټې له مسؤل سره وکتل
تېره ورځ د نيمروز ولايت د اطلاعاتو او کلتور رئيس، مفتي حبيبالله "الهام" په لویدیځ زون کې د افغان خبريالانو د خونديتوب د کمېټې له مسؤل شميلاحمد "مشعل" سره وکتل، چې پر مهال یې د آريانا نيوز او طلوع نيوز خبريالانو هم حضور درلود.
په دې لیدنه کې په لويديځه حوزه کې د افغان خبريالانو د خونديتوب د کميټې مسؤل شمیلاحمد "مشعل" د رسنیو او خبريالانو د ملاتړ په پار د نيمروز ولايت د اطلاعاتو او کلتور له رياست څخه د مننې سربېره د لا زياتو همکاريو غوښتنه وکړه.
ښاغلي مشعل زیاته کړه، دا د خوښۍ ځای دی، چې د ا.ا.ا. له واکمنۍ وروسته په نيمروز ولایت کې د خبريالانو له خوا هېڅ ډول شکايت نه دی ثبت شوی.
نوموړي د خپلو خبرو په ترڅ کې هغو رسنیو ته اشاره وکړه، چې په بهر کې فعالې دي او و یې ویل، هغه رسنۍ چې له هېواده بهر د اسلامي نظام پر ضد فعالې او نشرات کوي په حقیقت کې شایعات او پروپاګند خپروي.
په ياده غونډه کې د نيمروز د اطلاعاتو او فرهنګ رئيس مفتي حبيبالله "الهام" وويل، چې د اطلاعاتو او فرهنګ وزارت رهبري د اسلامي نظام د اصولو او تګلارې په پام کې نيولو سره د رسنيو د ودې په موخه هڅې کوي.
ښاغلي الهام زیاته کړه، دغه اداره هوډ لري چې له رسنیو او خبریالانو سره همکاري وکړي او د شته امکاناتو په پام کې نیولو سره به د دوی ستونزې حل شي.
۱۴۰۱/۱۱/۳۰ هـ ش
۱۴۴۴/۷/۲۸ هـ ق
