فراه کې د (نوای نخبګان) په نوم نوې راډیو فعالیت پیل کړ
فراه کې د دغه ولایت د مرستیال والي، د اطلاعاتو او فرهنګ رئيس، خبريالانو او يو شمير نورو مسؤلينو په شتون کې د (نوای نخبګان) په نوم یوې نوې راډیو خپرونې پيل کړې.
مرستیال والي مولوي محمد ګل خيبر د اسلامي او افغاني فرهنګ په خپراوي کې د رسنیو رول اړین وباله او ټينګار يې وکړ، چې ټولې رسنۍ بايد د هېواد او اسلامي نظام دښمنانو پر وړاندې مبارزه وکړي او تر ولسونو پورې دې، ديني لارښونې، نبوي سيرت، د ا.ا.ا شته لاسته راوړنې او پرمختګونه ورسوي.
ورته مهال د فراه د اطلاعاتو او فرهنګ رئيس رسنۍ د عامو وګړو په ذهنونو او فکرونو باندې اغيزمنې وسيلې وبللې او زياته يې کړه، چې رسنۍ بايد د ديني، ټولنیزو، فکري، عقیدوي، اخلاقي او سياسي خپرونو له لارې عامه افکار جوړ او وساتي.
همدارنګه د نوای نخبګان راډیو مدير مسؤل وويل: د دې راډیو پرانېستل په رسنيز ډګر کې يو نوی ګام دی او د خپل مسلکي ټيم په همکارۍ به د فراه ولس ته هغه څه چې خلک ورته اړتيا لري، وړاندې کړي.
په غونډه کې یو شمېر رسنیزو فعالانو د اطلاعاتو او فرهنګ ریاست څخه په دې ولایت کې د رسنیو او امارتي ادارو ترمنځ د همکارۍ او همغږۍ ښې فضا ساتلو له امله مننه وکړه او زیاته یې کړه، چې په دې ولایت کې شاوخوا لس رسنۍ پرته له کوم ګواښ څخه په ډاډه توګه فعاليتونه کوي او اطلاعاتو ته لاسرسی لري.
۱۴۴۸/۳/۲۶ هـ ق
