فاریاب کې له ګڼ شمېر فرهنګیانو او لیکوالانو سره د همغږۍ غونډه وشوه
د فاریاب ولایت د اطلاعاتو او فرهنګ ریاست له لوري د البرز علمي او فرهنګي ادارې په همغږۍ له ګڼ شمېر قلموال مبارزینو، د ټولنیزو شبکو فعالانو، ځوانانو او فرهنګي څېرو سره د همغږۍ د پیاوړتیا، د فرهنګي فعالیتونو د انسجام او عامه پوهاوي د لوړولو په موخه د همغږۍ غونډه ترسره شوه.
د فاریاب د اطلاعاتو او فرهنګ رییس مولوي شمسالدین محمدي د عامه پوهاوي د لوړولو او د ټولنې د اصلاح په برخه کې د قلموالو مبارزینو، لیکوالانو، ځوانانو او فرهنګي فعالانو رول مهم وباله او ویې ویل: د فرهنګ، علم او سالم فکر ترویج د فکري ودې او ټولنیز یووالي د پیاوړتیا زمینه برابروي.
نوموړي له فرهنګي فعالانو څخه وغوښتل، چې د قلم او ټولنیزو رسنیو له ظرفیت څخه د رغنده پیغامونو د لېږد، عامه پوهاوي او په ټولنه کې د مثبتو ارزښتونو د ترویج لپاره ګټه واخلي.
د غونډې په لړ کې د زمري ۲۴ (د فتحې ورځې) د مراسمو د ترسره کولو لپاره چمتووالی وارزول شو او د دې مناسبت د شاندارې نمانځنې په موخه د هر اړخیزې همغږۍ پر اړتیا ټینګار وشو.
همدارنګه، یو شمېر ویناوالو علم، قلم او فرهنګي فعالیتونه د ټولنې د پرمختګ له مهمو عواملو څخه وبلل او د فرهنګي او عامه پوهاوي د پروګرامونو پر پراختیا یې ټینګار وکړ.
د غونډې په پای کې، ګډونوالو د همکارۍ، انسجام او ګډو فرهنګي فعالیتونو د پراختیا په اړه خپل نظرونه او وړاندیزونه شریک کړل او د دغه ډول غونډو د دوامداره جوړیدو غوښتونکي شول
۱۴۴۸/۲/۲۴ هـ ق
