د سرپل اطلاعاتو او فرهنګ ریاست ته څو جهادي آثارو وسپارل شول
د سرپل ولایت د سانچارک ولسوالۍ یو تن دلګي مشر مولوي نوراحمد خالد له خوا، د امریکا او متحدینو پر وړاندې د شل کلن اشغال د جهاد دورې دوه لاسي جوړ شوي جهادي آثار، د سرپل د اطلاعاتو او فرهنګ رئیس ملا عبدالغفار حقنما په شتون کې د دغه ریاست اړوند د جهادي اثارو د ساتنې مدیریت ته وسپارل شول.
په دغو آثارو کې یو لس لیټره ژېړ رنګه د درنو وسایطو ضد بوشکه ماین او یو پنځه لیټره د سپکو وسایطو ضد د سړک غاړې بوشکه ماین شامل دي، چې د جهاد په دوران کې د مجاهدینو له خوا په لاسي ډول جوړ شوي او کارول کېدل. دغه آثار د ساتنې، خوندي کولو او د جهادي آثارو د ساتنې موزیم کې د ثبت په موخه د سرپل ولایت د اطلاعاتو او فرهنګ ریاست ته وسپارل شول.
ډلګي مشر مولوي نوراحمد خالد د دغو آثارو د سپارلو پر مهال وویل: د جهاد د یادګارونو ساتنه او پالنه د ټولو ګډ مسئولیت دی. نوموړي زیاته کړه، چې د دغو آثارو سپارل د جهادي آثارو د ساتنې په برخه کې د نوموړي د همکارۍ لومړنی ګام دی او په نږدې راتلونکي کې به د جهاد دورې یو شمېر نور آثار او یادګارونه هم د جهادي آثارو د ساتنې مدیریت ته وسپاري.
ورته مهال د اطلاعاتو او فرهنګ رئیس دغه جهادي آثار د جهاد په دوران کې د مجاهدینو د زړورتیا، استقامت او قربانۍ څرګندونه وبلله او ټینګار یې وکړ، چې د دغو آثارو ساتنه او خوندي کول د جهاد د تاریخ د ژوندي ساتلو او راتلونکو نسلونو ته د هغه د ارزښتونو د لېږدولو په برخه کې مهم رول لري.
۱۴۴۷/۱۲/۲۷ هـ ق
