د اطلاعاتو او فرهنګ وزارت د خپرونو چارو معين د لس عنوانه کتابونو تصديق ليک د ملي تدارکاتو ادارې مرستيال ته وسپاره
د اطلاعاتو او فرهنګ وزارت د خپرونو د چارو معين عبدالمنان شيواي شرق د ملي تدارکاتو د انستيتوت د ١٠ عنوانه کتابونو تصديق ليک چې د اطلاعاتو او فرهنګ وزارت د نسخي اخستنې په برخه کې ثبټ شوي دي د ملي تدارکاتو د اداري مرستيال احمد شاه نقشبندي ته وسپارل .
د باختر آژانس خبريال د خبر له مخې؛ د اطلاعاتو او فرهنګ وزارت د خپرونو د چارو معين عبدالمنان شيواي شرق د دغو تصديق ليکونو د سپارلو په وخت کې د ملي تدارکاتو د ادارې کارونه مهم وبلل او ويې ويل موږ د مسلکي زده کړو او د معياري سيستمونو د بنسټيز کېدو په لاره کې د ملي تدارکاتو د ادارې د انستيتوت د نوښت هرکلى کوو.
هغه زياته کړه د نسخې اخستنې (کاپي رايت) په برخه کې د ملي تدارکاتو د ادارې د انستيتوت نصاب چې د دغه بنسټ معنوي حق دى د قانون او مقررو له مخې همکاري او ملاتړ کوو او بايد دغه نصاب د نورو په واک کې ورنه کړى شي چې له هغه څخه د قانون پرخلاف نسخه واخلي .
د ملي تدارکاتو د ادارې مرستيال احمد شاه نقشبندي د خپلو اثارو د ثبتولو په خاطر د اطلاعاتو او فرهنګ له وزارت څخه مننه او قدرداني وکړه او ويې ويل دغه اداره د ادارو د تدارکاتي کارکوونکو د تخصصي کېدو په خاطر د کابل په پولي تخنيک پوهنتون کې يو انستيتوت جوړ کړى دى او دغه انستيتوت تعليمي نصاب ته اړتيا لري او تراوسه پورې ١١ اثار د اطلاعاتو او فرهنګ وزارت د نسخې اخستنې په برخه کې ثبت کړي دي .چې موږ نن د ١٠ اثارو د تصديق ليکونو د ترلاسه کولو شاهدان يو.
هغه د اطلاعاتو او فرهنګ له وزارت څخه قدرداني وکړه او ويې ويل موږ چمتو يو چې په دې لاره کې د اطلاعاتو او فرهنګ وزارت له تدارکاتي کارکوونکو سره همکاري وکړو.
کابل/ د کب ٢٨ مه باختر
