لوګر کې د شاوخوا ۴ زره تنو زده کوونکو ترمنځ د ترسره شوې سیالۍ مخکښ ګډونوال وستايل شول
د لوګر اطلاعاتو او کلتور ریاست، الکوثر فکري او فرهنګي ادارې او پوهنې ریاست په ګډو همکاریو د شاوخوا ۴ زره تنو زده کوونکو او ځوانانو ترمنځ (د شرعي نظام په استحکام کې د اطاعت اغيزې) په نوم سیالۍ ترسره شوې وه، چې۴۰ تنه مخکښ ګډونوال یې په بېلابېلو ډالیو وستايل شول.
د اطلاعاتو او کلتور رئیس مولوي فیض الله جوهري له یادې سیالۍ څخه موخه د زده کوونکو او ځوانانو ظرفيت لوړول، د ځوانانو علمي هڅونه او د مطالعې کلتور پیاوړتیا یاده کړه او ډاډ یې ورکړ، چې د ورته سیالیو لړۍ به جاري وساتل شي.
دغه راز د لوګر پوهنتون رئیس مفتي ضیا احمد صارم او د پوهنې رياست د اسلامي زده کړو مرستیال وویل: ټولو مکلف یو، چې د رسول (ص) په سیرت او سورت ځانونه برابر کړو، دوی ځوانانو ته په خطاب کې زیاته کړه، چې پرتاسو د بیت المال لګښت کيږي، نو هڅه وکړئ، چې له شته فرصتونو څخه د خپل علم ظرفیت لوړولو په برخه کې ګټه واخلئ.
د يادونې وړ ده، چې په دغه سیالۍ کې د پل علم ښار اړوند او ولسوالیو شاوخوا ۴ زره تنه زده کوونکو او ځوانانو ګډون کړی وو، چې لومړی مقام ګټونکي ته یو پایه لپ ټاپ کمپیوټر، دویم مقام ګټونکي ته یو عراده بایسکل، دریم مقام ګټونکي ته یو سیټ مبایل او پاتې نورو ګډونوالو ته بېلابېل ډالۍ ووېشل شوې.
۱۴۴۷/۵/۱۱ هـ ق
