پروان کې د امارتي ادارو او رسنیو مسؤلینو ترمنځ د همغږۍ ناسته ترسره شوه
دغه غوڼده د پروان ولایت د والي په مشرۍ د ولایت په مقام کې ترسره شوه، چې پکې د اطلاعاتو او کلتور رئیس، د رسنیو مسؤلینو، امارتي ادارو ویاندویانو او خبریالانو ګډون کړی وو.
د پروان والي مفتي محمد ادریس انوري د رسنیو مسؤلیتونو په اړه خبرې وکړې او ویې ویل: د ولسونو د ذهنونو په ویښتیابه کې د رسنیو رول مهم دی او د رسنیو د خپرنیزو فعالیتونو په لا ښه کېدو یې ټینګار وکړ.
نوموړي زیاته کړه، چې مسلمانان باید د اسلام دین لپاره پوره یوالۍ ولري او د اسلام مبارک دین د لارښونو په رڼا کې عمل وکړي.
د اطلاعاتو او کلتور رئیس مولوي شمس الحق صدیقي د یو شمېر رسنیو د مسؤلینو له فعالیتونو او کړنو څخه د خوښي څرګندولو ترڅنګ د رسنیو د مسؤلیتونو او مکلفیتونو په اړه خبرې وکړې او ویې ویل: زموږ څخه هر یو د خپلو کړنو په ځانګړې توګه د خپرنیزو فعالیتونو ترسره کولو مسؤل دی او باید د اسلامي نظام دفاع په موخه لا ډېر کوښښ وکړو.
په ورته وخت کې، د یو شمېر رسنیو مسؤلینو او خبریالانو د دغې ناستې جوړولو څخه د مننې ترڅنګ د عامه افکارو په جوړولو کې د رسنیو رول مهم یاد کړ او د رسنیو په ملاتړ یې ټینګار وکړ.
۱۴۴۷/۱/۱۱ هـ.ق
