تخار کې د امارتي ادارو ویاندویانو او خبریالانو سره د همږغۍ ناسته وشوه
د تخار ولایت د اطلاعاتو او کلتور ریاست د مسؤلينو له لوري د دې ولایت د امارتي ادارو ویاندویانو او سیمه ييزو خبریالانو سره د همږغۍ ناسته وشوه.
د تخار ولایت د اطلاعاتو او کلتور رئیس مولوي ذبیحالله انصاري د اطلاع رسونې پر ارزښت او اهمیت خبرې وکړې او له خبریالانو یې وغوښتل، چې د ژورنالېزم اخلاقو ته ژمن پاتې شي او خپلې خپرونې دې د ژورنالېزم له اصولو سره سمې خپرې کړي.
نوموړي زیاته کړه؛ د اطلاعاتو او کلتور ریاست په پام کې لري، چې د روان کال په ترڅ کې د خبریالانو د ظرفیت لوړولو لپاره بېلابېل روزنیز پروګرامونه پیل کړي.
خبریالانو او د رسنیو مسؤلینو د اطلاعاتو او کلتور ریاست له ملاتړ او همکارۍ مننه وکړه او ژمنه یې وکړه، چې خپرونې به د خپرنیزو تګلارو له مخې چمتو او خپرې کړي.
د یادونې وړ ده، چې د اطلاعاتو او کلتور رئیس د دې ولایت له ځینو سیمه يیزو راډیوګانو هم لیدنه وکړه او له رسنیزو مسؤلینو سره یې د ګټورو او اغېزمنو خپرونو پر جوړولو خبرې وکړې.
۱۴۴۶/۱۰/۱۷ ق
