د جهادي ارزښتونو د ساتنې عمومي رئیس د زابل له مرستیال والي او قلموالو سره ناسته وکړه
د جهادي ارزښتونو د ساتنې عمومي رئیس مولوي ذبیح الله نوراني د یوه پلاوي په ملتيا د زابل ولایت له مرستیال والي مولوي محب الله حماس او د اطلاعاتو او کلتور ریاست په همږغۍ د یاد ولايت له مشهورو او مخورو قلموالو سره جلا علمي او فکري ناستې وکړې.
په پیل کې د زابل ولایت مرستیال والي مولوي محب الله حماس یاد پلاوي ته ښه راغلاست ووایه او د جهادي ارزښتونو عمومي ریاست له چارو یې خوښي څرګنده کړه، ښاغلي حماس د یاد رياست فعالیتونه مهم وبلل او په اړونده برخو کې یې ورسره د هر راز همکارۍ ژمنه وکړه.
ورپسې د جهادي ارزښتونو د ساتنې عمومي رئیس مولوي ذبیح الله نوراني د جهادي ارزښتونو عمومي ریاست د چارو پر اهمیت، اړتیا او د ولایتونو په رول تفصیلي خبرې وکړې، ښاغلي نوراني زیاته کړه، موږ د ټولو جهادي ارزښتونو په راټولولو او راتلونکو نسلونو ته یې د رسولو په برخه کې هلې ځلې کوو، همدا راز مو د شهيدانو د سوانحو او ژوندلیکونو په را ټولولو کې له پوره دقت څخه کار اخیستی دی.
له قلموالو سره د ليدنې په ترڅ کې د جهادي ارزښتونو د ساتنې عمومي رئیس مولوي ذبیح الله نوراني د زابل ولایت د مجاهدینو تاریخي کارنامو ته اشاره وکړه او د تېرو شلو کلونو د مبارزو او سرښندنو یادونه یې وکړه، نوموړي وویل: د اسلام او خاورې دښمنانو د مجاهدینو سپېڅلی جهاد د رسنیو او کتابونو له لارې تحریف کړی، چې علت يې جهادي تاریخ ته نه پاملرنه ده.
مولوي نوراني زیاته کړه؛ اوس چې په هېواد کې امنیت تأمین شوی، دا یو مناسب فرصت دی، چې د مجاهدینو او شهیدانو ریښتینی تاریخ تدوین شي او د مستندو لیکنو او کتابونو له لارې راتلونکو نسلونو ته انتقال شي.
په پای کې قلموالو خپل نظریات او وړاندیزونه وړاندې کړل او د جهادي ارزښتونو د ساتنې په برخه کې یې د هر ډول مرستې او همکارۍ ډاډ ورکړ.
۱۴۴۶/۹/۲۴ ق
۱۴۰۴/۱/۴ ل
