د ښوونیز مرکز زده کوونکو ته د فکري رغښت یو ورځنی سمینار جوړ شو
د پکتیکا ولایت د اطلاعاتو او کلتور رياست د ځوانانو چارو آمريت اړوند ښوونیز مرکز کې څه باندې اتیا تنو زده کوونکو او ځوانانو ته د فکري رغښت تر عنوان لاندې يو ورځنی سمينار جوړ شو.
ياد سمينار د ځوانانو د فکري رغښت د لوړولو په موخه جوړ شوی و، چې پکښې د پکتیکا اطلاعاتو او کلتور رئیس ملا محمد امین حذیفه، د پکتیکا پوهنتون استاد محمد عمر صلاح الدین او د ښوونیز مرکز استادانو ګډون درلود.
د سمينار وړاندي کوونکي استاد محمد عمر صلاح الدین د فکري جګړې په تاريخ، په اسلام کي د فکري روزنې ارزښت، پر ذهنيتونو د يادې روزنې اغېز او پر وړاندې يې د چمتووالي او مبارزې اړوند اړين او چمتو شوي معلومات وړاندې کړل.
نوموړي وویل: اوسني ځوانان بايد خپل ذهنونه، کلتور، ملي ارزښتونه، صورت او اخلاق د غربي فکري جګړې څخه خوندي وساتي او پر وړاندي يې په کلک هوډ سره ودرېږي او مبارزه وکړي.
د یاد سمينار ګډونوالو د خوښۍ څرګندولو ترڅنګ د اطلاعاتو او کلتور رياست کړنې وستايلې او د ورته سمينارونو د ترسره کولو غوښتنه يې وکړه.
د سمینار په پای کې ټولو ګډونوالو ته د فکري روزنې کتابونه هم ډالۍ شول.
۱۴۴۶/۸/۶ ق
۱۴۰۳/۱۱/۱۷ ل
