هلمند کې عامه کتابتون ته ۷۶۷ ټوکه کتابونه ډالۍ او له دوو ښوونيزو مرکزونو سره هوکړه ليکونه لاسليک شول

د هلمند ولایت د اطلاعاتو او کلتور ریاست اړوند هلمند عامه کتابتون ته ٧٦٧ ټوکه کتابونه چې د مرحوم الحاج مولوي محمد حنفي صاحب له لوري لیکل شوي وه، د محب الله محبت له لوري ډالۍ شول.
د عامه کتابتون مدیر محسن عمري د ښاغلي محبت څخه مننه وکړه، چي د خپل مرحوم پلار له لوري لیکل شوي کتابونه یې عامه کتابتون ته ډالۍ کړل.
نوموړي وویل: دې کتابونو کې دیني، اسلامي او اصلاحي کتابونه شامل دي، چې په یادو برخو کې به د عامه کتابتون تشه ډکه کړي او لوستونکي به وکولای شي، چې د یادو کتابونو څخه خپل معلومات پوره کړي.
د یادوني وړ ده، چې مخکي هم د هیوادوالو له لوري هلمند عامه کتابتون ته بېلا بېل کتابونه ډالۍ شوي دي، چي د یاد مدیریت له لوري ثبت او په ټاکل شویو ځایونو کي ځای پر ځای شوي دي.
بل لور ته د ځوانانو چارو آمر مولوي حیات الله یوسف د ذکي خصوصي ښوونیز مرکز مسؤل حبیب الله ذکي او خپلواک درمان د ساینسي علومو ښوونیز مرکز له مسؤل نور الدین خپلواک سره هوکړه لیکونه لاسلیک کړه.
یادو مسؤلینو د هوکړه ليکونو د لاسلیکولو پر مهال په دایمي همکاریو او د ټولنې پر خدمت کولو هر اړخیز  بحث وکړ.
یادو هوکړه لیکونو کې ویل شوي، چي ذکي خصوصي ښوونیز مرکز به هغه زده کړیالانو ته چې د ځوانانو چارو امریت له لوري ورپېژندل کیږي، د انګليسي ژبې زده کړو کې ۳۰ سلنه تخفیف ورکوي.
همداراز د خپلواک درمان ساینسي علومو ښوونیز مرکز سره په هوکړه لیک کي ویل شوي چي د یاد امریت له لوري ورپېژندل شويو زده کوونکو ته به په کانکور امادګۍ او د ساینسي علومو زده کړو کې ۵۰ سلنه تخفیف ورکوي.

۱۴۴۶/۳/۲۱ هـ ق
۱۴۰۳/۷/۳ هـ ل