لوګر کې یوې نوې راډیو په فعالیت پیل وکړ

په لوګر کې یوې نوې خصوصي راډیو په داسې حال کې خپرونې په رسمي توګه پیل کړې، چې ترڅنګ یې ۶ نورې دولتي او خصوصي راډیوګانې هم فعالیت کوي.
په همدې موخه جوړو شويو مراسمو کې د اطلاعاتو او کلتور وزارت د فرهنګ او هنر معین مولوي عتیق الله عزیزي، د باختر اطلاعاتی اژانس رئیس مولوي ضیاءالحق حقمل، د لوګر د اطلاعاتو او کلتور رئیس دوکتور رفیع الله صمیم او یو شمېر خبریالانو ګډون کړی وو.
د اطلاعاتو او کلتور وزارت د فرهنګ او هنر معین مولوي عتیق الله عزیزي وویل؛ د لري پرتو سیمو اوسیدونکو لپاره راډیو یوازينۍ رسنۍ ده، چې خلکو ته اطلاع رسونه کې مهم رول لوبوي، نوموړي د دې راډیو له مسؤولینو غوښتنه وکړه، چې د اسلامي نظام د پالیسۍ مطابق نشرات وکړي. 
د باختر اطلاعاتی اژانس رئیس مولوي ضیاءالحق حقمل وویل: اسلامي امارت د رسنیو پوره ملاتړی او همکار دی، ښاغلي حقمل له رسنیو غوښتنه وکړه، چې د شریعت په چوکاټ کې او دغه راز د اسلامي امارت له پالیسۍ سره سم خپل رسنیز کارونه په ډاډه ډول مخته یوسي.
د لوګر د اطلاعاتو او کلتور رئیس رفیع الله صمیم وویل: ډیر د خوښۍ ځای دی، چې نن یو وار بیا په دې ولایت کې د یوې نوې راډیو د پرانیستې شاهدان یو، نوموړي زیاته کړه، د اسلامي امارت له راتګ سره د رسنیو وضعیت ښه شوی، تر اوسه په دې ولایت کې د رسنیو او ولایتي ادارې ترمنځ هېڅ ډول ستونزه نه ده رامنځته شوې.
نوموړي ډاډ ورکړ، چې د رسنیو د ملاتړ په برخه کې به له هېڅ راز هلو ځلو ډډه ونشي.
د یادونې وړ ده، چې اوسمهال په لوګر کې د ملي راډیو سربېره ۵ خصوصي راډیوګانې فعالیت کوي او ترڅنګ يې د باختر اطلاعاتي آژانس، د اطلاعاتو او کلتور ریاست میاشتنۍ جریده او د لوړو زده کړو موسسې عینک په نوم مجله هم چاپیږي.

۱۴۴۶/۶/۵ هـ ق
۱۴۰۳/۹/۱۷ هـ ل