(د مني د خطاطۍ او نقاشۍ آثار) تر عنوان لاندې نندارتون پرانیستل شو

نن یکشنبه(٢٢، د جمادي الاول، ١٤٤٦) د اطلاعاتو او کلتور وزارت د هنر او فرهنګ معنیت اړوند د هنرستان ریاست، د نګارستان آمریت له لوري د مني د نقاشۍ او خطاطۍ آثارو تر عنوان لاندې نندارتون د هنرستان ریاست په نګارستان آمریت کې پرانیستل شو. 

په دغه نندارتون کې د اطلاعاتو او کلتور وزارت د کارکوونکو چارو ریاست رئیس مولوي نقيب الله نعمان، د هنرستان رئیس مولوي محمد لعل منیب، د نګارستان آمر مفتي رفيع الله ناصح، هنرمندانو، نقاشانو، خطاطانو، استادانو، خبریالانو، د رسنیو مسؤلینو او ځوانانو ګډون کړی وو. 

دغه نندارتون د قرآن کريم په څو مبارکو آياتونو سره پیل شو، ورپسې د اطلاعاتو او کلتور وزارت د کارکوونکو چارو رئیس مولوي نقيب الله نعمان د هنرستان ریاست د فعالیتونو د ستاینې په ترڅ کې وویل: هنر او نقاشي لرغونې مخینه لري، چې د هېواد یوه اړتیا ګڼل کېږي، د اطلاعاتو او کلتور وزارت د هنرمندانو، نقاشانو او خطاطانو هر اړخیز ملاتړ کوي.

نوموړي له هنرمندانو وغوښتل، چې خپل مسلک کې زياتې هڅې وکړي او هېواد ته وياړونه ور په برخه کړي. 

د هنرستان رئیس مولوي محمد لعل منیب د خپلو خبرو په ترڅ کې له هنرمندانو وغوښتل، چې د چارو د ښه والي په موخه خپل نظرونه او وړانديزونه له هنرستان ریاست سره شريک کړي. 

د پوهنتون استاد ایمل میاخېل له هنرستان ریاست څخه مننه وکړه، چې د هنرمندانو، خطاطانو او نقاشانو د هڅونې لپاره دغه ډول پروګرامونه جوړوي. 

د غونډې په پای کې د اطلاعاتو او کلتور وزارت د هنر او فرهنګ معينيت د هنرستان ریاست له لوري هنرمندانو، خطاطانو او نقاشانو ته ستاينليکونه هم ورکړل شول. 

۱۴۰۳/۹/۴ ه‍ ش

۲۰۲۴/۱۱/۲۴میلادی