بغلان کې د رسنيو له مسؤلينو او خبریالانو سره د همغږۍ ناسته ترسره شوه
سه شنبه (۲۱ د شوال المکرم ۱۴۴۵ ) د بغلان د اطلاعاتو او فرهنګ ریاست له لوري د رسنیو له مسؤلينو او خبریالانو سره د همغږۍ میاشتنۍ ناسته ترسره شوه.
د بغلان د اطلاعاتو او فرهنګ رئیس مولوي اسدالله مصطفی هاشمي وویل: په دې ولایت کې فعالې رسنۍ او د ملي رسنیو خبریالان دې د ملي ګټو، اسلامي او ټولنیزو ارزښتونو په پام کې نیولو سره خپلې نشراتي او مطبوعاتي چارې ترسره کړي.
هاشمي زیاته کړه؛ اطلاعاتو ته د خبریالانو او رسنیو د بشپړ لاسرسي لپاره به په دې ولایت کې فعال ریاستونه د خپلو ورځنیو چارو، پرمختګونو، لاسته راوړنو او ترسره کېدونکو غونډو د خپراوي لپاره ویاند او یاهم خپل یو تن کارکوونکی رسنیو سره د همغږۍ لپاره دغه ریاست او خبریالانو ته ورپيژني، چې د اړتیا په وخت کې رسنیو او خبریالانو ته پر وخت کره معلومات په واک کې ورکړي.
د خبریالانواو رسنيو په استازیتوب رازمحمد راز، نورګل اندړوال او نورو خبريالانو د خپلو خبرو په جريان کې ټینګار وکړ، چې پر وخت او کره اطلاع رسونې ته ژمن دي او د ژورنالیزم د اصولو په پام کې نیولو سره به هڅې وکړي، څو په روان ۱۴۰۳ کال کې د هېواد او خلکو په ګټه اغېزناکې خپرونې جوړې کړي.
۲۰۲۴/۴/۳۰ ميلادي
۱۴۰۳/۲/۱۱ ھ ش
